من غير لف ودوران

شوف يا سيدي نظرية #النسبية لكل شئ فى كل شئ نظرية تبدو مقنعة،وكلام السبعة انت شايفها ثمانية وأنا شايفها سبعة والكلام ده،، حلو قوى ،، لكن يا صديقي السبعة ولا الثمانية دي لازم حضرتك تكون حاجة من الاتنين ومستحيل تكون سبعة وثمانية،فأحد القولين صحيح والآخر خطأ ،، طب نعمل إيه؟نتأكد طبعاً ونبحث لحد ما نجيب آخرها،ولا نستقر إلا بدليل وبرهان،طيب لو ماتأكدناش خلاص ساعتها كلٌ حسب اجتهاده،بس ماننكرش على بعض، بس فيه حاجة ثابتة دايما وماتتغيرش اسمها "اللغة"،الكلام هو اللي بينقل المواضيع لمسافات وأزمنة بعيييدة،وهو اللي باقي والصور وغيرها سيمحى ، وبالذات فى القوانين والعلوم، اللغة والكتابة أهم شئ،،يمكن يكون فى الفنون والآداب فيه تصوير ونحت وكده، لكن العلم له لغة الكتابة.
المهم، تقولي بأه "وجهات نظر"،الكلام ده ينفع فى التنظير الدنيوي،لكن فى مجال الدين فيه نص،كلام مكتوب،نفهمه بوضوح وبقواعد اللغة العربية ، ولما يختلف عليك المعنى فالاحتمالات لا تنتهي،الظاهر والواضح والبيان هو الدلالة التى تنقذك،لأن بدونها سيضيع النص بين متشدد ومتساهل ،سيضيع بين بدوي ومدني! بين شرقي وغربي! بين قوي وضعيف! كل واحد حيعمل له دين خاص بشخصيته والشخصيات اللي زيه أو التابعة ليه!! الكلام ده ماينفعش،إلا في حالة فعلاً تعارض ظاهر مع ظاهر آخر،ساعتها يتجمع مابينهم بطرق كثيرة وساعتها ممكن نختلف بس خلاف بسيط جداً، خلاف سببه النص وكلاهما محتمل،مش خلاف سببه فهمك للنص!! النص ثابت ومقدس وواضح وظاهر وبيِّـن ،بيانه اللغة العربية والمنطق وضرورة العقل والحِس.
كل التوهان واللف والدوران ده عشان أقولك،أنا ليه ظاهري المنهج،عشان مايتوِّهنيش "شيخ" أو "داعية" أو "منافق" في أن الدين حمَّال أوجه !! لا يا سيدي حمَّال أوجه دي تنفع بره المحكمة #شاهد_ماشفش_حاجه ، لكن هنا عند الوحي القسم الرسمي والله العظيم أقول الحق،والحق ظاهر واضح.
وبصفتي عرفت ناس من كل الأصناف :)) إشي سلفي على إخواني على أزهري على ليبرالي على علماني، فكلهم بيختلفوا فى الدلالة والمقصود من نصوص الدين، مين بأه المرجع حضرتك؟؟ العلماء. أيوه أنهي علماء؟ السلفيين ولا الإخوانيين ولا الأزهريين؟؟؟؟ فانتهيت لإن المرجع الثابت الوحيد هو ظاهر النص، ظاهر النص واضح وسهل ويفهمه كل إنسان ببساطة،،ويا عمي ألاقي شيخ يقول اللحية فرض والتاني لأ دي مباح حلقها !! إيييه يا جدعان!!! لا يا عم الشيخ ،، الظاهر بيقول إيه؟؟ بيقول اللحية أمر ، والأمر واجب ، خلاص انتهينا، كوني بأه ملتحي ولا مش قادر التحي دي قصة تانية. وواحد يقول لي الكلب نجس والتاني لأ لعابه بس والتالت مش نجس خالص! الظاهر بيقول إيه؟؟؟؟ بيقول مش نجس ،، طويب :)) .
يا عم الله يسترك ماتدخلنيش فى حوارات ولف ودوران،وشيخ عايز يشدد وشيخ عايز يبحبح،،وتلففني وتدوخني ولفة كمان وتاخد خمسة وسبعين قرش!! وتوتة توتة فرغت الحدوتة ،، ومن يومها وهو "السندباد الظاهري" وائل السنهوري :))

أسطورة مصرية ( دي غير حدوتة مصرية تماماً :) )

يبدو أن الثورة كما أخرجت أجمل ما فينا،،فقد أخرجت أيضاً أقبح ما فينا!! المهم إنها أخرجت وخلاص !! فبعد خسارة تتح فى الجولة الأولى من الانتخابات الرئاسية،،وحصول صبَّح على نسبة عالية وخسارته برضه،،تحولت الدنيا إلى دنيا أخرى ١٠٠٪ #حقيقةعلمية ،، بعد كده انقسم الناس نصفين،،نصف "إخوانجي" ونصف "ثورجي" !!!! وبعد كده انقسم كل نصف إلى أقسام برضه المهم فى الآخر تظل الأقسام إخوانجي وثورجي!!!
فقط من يقول للآخرين انتوا إخوانجية بيتغيروا بس :))) ،، وبعد ما كان الجميع فى خندق واحد،، الخندق طلع مَصْفَه !!!! وربنا يُستُر. وبعد انقلاب الدنيا إلى إخوانجي و ثورجي ،، جاء موعد برنامج عالم الحيوان ، فالإسلامي بقى اسمه "خروف"،،والعلماني والليبرالي بقى اسمه "خنزير":(،، موش بس كده،،لأ ،، الأصدقاء بقوا "يشتموا" بعض حقيقة مش مجرد اختلاف فى الرأي،، والشتيمة بقت شعار المرحلة ،، اشتم حتى أراك :((،، والخلاف لم يعد سياسياً بقدر ما هو "ثأر" ،، فيه ناس حست انها اتخدعت واتغرغر بيها وبعد ما اتفت ولا مؤاخذة بقوا بيتفوا فى خلق الله كلهم :(( ،، وخللي بالك إن الثورة مالهاش دعوة خالص سعادتك،،العيب فيكو يا ف حبايبكم أما الثورة يا روحي عليها ،، وتقول الأسطورة أن الشباب الطاهر الذي جاء من كوكب "طاهورو" استقل الطبق الطائر بتاع الساعة ٦ الصبح عائداً لكوكبه، بعد ما اتهزق بعد الثورة :(( ،، و ڤيروس الشتيمة اتبعه أعراض جامدة مثل البلوك ، والأنفريند ،، لمجرد النقاش فقط !! ،، وبعد ما كنا عايزين نتعرف على بعض بقينا عايزين نخنق بعض!! وكل الصفحات الفيسبوكية اللى جمعت الناس أصبح الآن وظيفتها تجاري الوضع،، صفحات "إخوانجية" وصفحات "ثورجية" أومااااال،، دي صابونة ودي صابونة !! بس يا سيدي وعنها و فؤاد المهندس قعد يهز الشجرة اللي عليها الثوار كلهم فطار كل واحد على بلده،،إخوانيا وليبراليا وعلمانيا ويساريا #حقيقةعلمية ، المهم بأه فى الأسطورة هو "الشعب"،، اللى هو زي ما بيقول سلطان السُكَّري،على رأي المثل "الشرطة فى خدمة الشعب" ،، الشعب اللى اتبهدل معاكم !! الشعب ده بأه اتقال عنه كل حاجة ،، كل حاجة والعكس ،، لما الشعب بقى ماشي يقول "مش مصدق نفسي يا لمبي ، ولو مش عاجبك الكدة،دوق السجق سعادتك"!! وتحكي الإسطورة إن الشعب الواعي اللي زي الضربة،بقى يسكت يسكت ويطلع فى الانتخابات والاستفتاءات وبس،،غير كده شعاره"إهري يا مهري وأنا على مهلي" ، وقالهاالشعب مدوية:من الشعب المصري العظيم إلى النُخَب كلها نشكركم على حسن تعاونكم وإلى لقاء آخر فى عمليات أخرى بإذن الله،فى صحتك كاسين خروب:) ، والمنطق ركب الطبق الطائر مع الشباب الطاهر ونزل كوكب كوميديا !! انطلقققققققققق :) ، وأنا من هذا المزنق أطالب كل القوى لأنها اتفقت على مكايدة بعضها فقط،أن تغير السلام الوطني إلى"والنبي لنكيد العُزَّال ونقول اللى ماعمره اتقال" غناء وتلحين خالد الذكر محرم فؤاد (بدل خالد الذكر سيد درويش وكدهون). وتوتة توتة فرغت الأسطورة :)