حكاية البرمجة اللغوية العصبية والمعلمين باندلر و جريندر

أجدع حاجة انى قريت والحمد لله على فضله فى البرمجة اللغوية العصبية كتيييير ومش كتب بتاع الجرايد.لأ كتب مرجعية للمؤسسين جريندر وباندلر.روعة. . .وسيبك من اللى بيقول ده حرام والكلام ده وحط دول مع اللى بيحرم دراسة المنطق . . دول غير منطقيين بالمرة :)) . . . صحيح فى إقحامات ع العلم ده من عقائد ما . . لكن ده مش من العلم ده خالص مالص.وصحيح إن من تكلم فى غير فنه أتى بالأعاجيب!! بالنوسبة للبرمجة اللغوية العصبية وأى علم لازم عندى أعرف بدأ إزاى؟! تاريخ كده صغنطوط مبسط بساطة ماتستبسطهاش :)) والموضوع وما فيه ان كان فيه واحد بيدرس رياضيات وعلم نفس اسمه ريتشارد باندلر كان مرة عليه واجب انه يدرس نمط العلاج النفسى بالجشتالت(مش مهم يعنىإيه)لمعالج المهم خد تسجيلات صوتيه لجلساته ونزل "مدح" :)) يفهم نمط علاجه إزاى وبيقول إيه بالظبط؟! ونجح فى معرفة النمط والأسلوب وجربه بنفسه ونجح!! قوووم لما هو نجح فرح أوى وراح يدرس نمط العلاج الجماعى للأبله "فيرجينيا ساتير" ونزل "مدح" برضه بس المرة دى استعان بصديق . هو مش صديق أوى، استعان ب جون جرايندر(مطحنة يعنى :)) ) وده دكتور لغات ولينجويستكس وكلام مكلكع كده :)) والدكتور ماقالش بأه أنا لا ممكن أساعد تلمووذ!! #PT لأ ساعده لما طلب منه ؛ بعلوم اللغة وأصولها وإزاى فيه كائن فى الحقيقة بنفكر فيه بمخنا ونسميه اسم وبعدين نرسم صورة عنه ف دماغنا وبعدين بعد كده نترجم الصورة الذهنية دى لكلام تانى ونقول اسمه ونخاطب الناس باللى فى دماغنا ده.وفى هذوها الأثناء بتضيع بعض التفاصيل!! هذوها التفاصيل بتضيع بفعل المخ البشرى لأسباب ما. .المهم انه ساعده ونجحوا سوا سوا واكتشفوا كشف وفتح كبير أوى أوى عدم اللامؤاخذة :)) الفتح ده هو ان كل خبرة بشرية ممكن تتحول لنمط وطريقة عمل "برنامج" يتنسخ من شخص للتانى كدهون وفى منتهى البساطة!!وقعدوا يعالجوا ف خلق الله. وقالك احنا نسمى بأه اللى احنا عملناه ده. .وزى الأفلام العربى واحد باسمى والتانى باسمك :))) آه والله :)) قالك العملية دى عملية برمجة . . حلو؟! طيب بنستعمل فيها مهارات اللغة بتاعة جريندر ومهارات علم النفس والأعصاب وكدهون بتاعة باندلر. يبقى نسميها "برمجة لغوية عصبية" أو "عصبية لغوية" مش فارق يعنى :))) وبالعنجلزى Neuro Linguistics Programmingوعشان يعيشوا دور الاختصار الأمريكانى طبعا تبقى NLP وهوب راحوا على دكتور تانى بتاع تنويم إيحائى.المسمى خطأ من البعض مغناطيسى أو طغطاطيسى . والبلية دارت معاهم بأه وربنا فتحها عليهم وطبعا انت عارف ان البلية لما تدور.مع حد بيحصل معاه إيه. .بيتنمرد للأسف :(( واختلفوا وانفصلوا!! وحصل بينهم قواضى ومحاكم وباندلر يقول أنا اللى بدأت ده بتاعى وجريندر يقول لأ تاعتى أنا . .ومحاكم وأريد حلة والحاجات دى عندهم برضه :) لحد ما القضاء حكم ان الاتنين هما ال Co-Founders للعلم ده اللى أصلا دكاترة الطب النفساوى مش عترفين انه علم أصلا!! لأنه حيقطع عليهم :))
وبس خلاص . . ونكمل بعدين بأه بعد ما قطعنا ف فروة المعلم باندلر والأسطى جريندر .
بس القهوة بتخسر يا معلم
قال له كفاية عليا كلمة معلم :)
والسلام عليكم . . . . .

اقرأ "الكفاف". .اقرأ "الكفاف"

اقرأ الآن كتابا أجبرنى على قرائته. وطلع المؤلف فى المقدمة بشوية كلام بالصلاة على النبى يخللوا الواحد زى اللى بيسمع حواديت ألف ليلة وليلة!! ومش قادر ينام غير لما يخلص الصفحة دى والصفحة تجر أختها لحد ما الواحد يذبهل و ينبسط . . والراجل لازم ينبسط يا زينب . . والكاتب حالف يبسطك. الكتاب اسمه "الكفاف" محاولة لإعادة صياغة قوانين اللغة وتخليصها من سندوتش النحاة :)) وتبسيطها للآكلين والشاربين :)) وبالهنا والشفا. وفيه نوس (ناس يعنى) بتبقى محافظة وفيه نوس تانية بتبقى مجددة..كله حلو وجميل بس النوس دول و دول ساعات بيتخانقوا مع بعض.واحب أقولهم كخ عيب:). الكتاب ده بيريح الزباين كلها المحافظين والمجددين وبيمزج المزازيج وبيأحلى النافوخ :)) ونؤسف على اللغة بس بنحلى بضاعة فى عين زباين جديدة. المهم ده رابط لتحميل الكتاب . . http://is.gd/VkTrG8  وكله يقف طابور ومن غير زحمة وكله حياخد نسخته بإذن الله :))) .
بيقولك يوسف الصيداوى فى كتاب الكفاف:"نظرية العامل النحوى:لقد نظر أئمة اللغة فى كلام العرب فرأوا أن بعض الكلام يؤثر فى بعض.فعبروا عن المؤثر بمصطلح "العامل" وعبروا عن المتأثر بمصطلح "المعمول" وكان هذا فى تاريخ الفكر اللغوى فتحا دونه كل الفتوح. فقد كشف عن روابط الكلام فى العبارة وعن إعراب المفردات وسبب نصبها ورفعها وجرها وجزمها وهو تأثير "العامل" فيها"
حلو كده والله وكلام سهل وسلس وشعبى وبيس ويفهمه كل واحد من شعب قهوتنا بإذن الله والله الموفق والمستعان.
يوسف بيك الصيدواى بيقول كمان ان نظرية العامل دى معجزة بشرية فعلا تدعوا للفخر أننا أتينا بها لتفسير الظاهرة الإعرابية. وبيضرب مثال ان "أكل زيد رغيفا" وهو مثال يجوع ع الصبح :)) ان زيد فاعل مرفوع ورغيفا مفعول منصوب. حاجة فل :)) لكن اللى رفع الفاعل ونصب المفعول هو "العامل" فعل "أكل" وزيد و الرغيف الاثنين "معمولين" للعامل ده من قوته بأه وفرد عضلاته :)) . وبيقول عمنا الصيداوى ان الفكر ده أقل ما يجنى منه أن المتكلم إذا تكلم بفعل عرف ان الفاعل بعده مرفوع ولو له مفعول يبقى منصوب وهكذا. وليت نحويا وقف عند هذا ولم يتجاوزه، إذا لانطبق النحو على القاعدة إنطباق الكف على الكف (ده غير شحاته أبو كف عسسان ماحدش يتلخبط) أو قل لكن النحو هو القاعدة . ولكن هذا لم يحدث بل كان الإنصراف إلى العامل واستظلال القاعدة به حتى أصبح صنما يدار حوله ويطاف. وإن كان موجودا سمى عاملا لفظيا. وإن لم يوجد فهو مستتر أو محذوف وجوبا أو جوازا. فإن لم يكن لا هذا ولا ذاك ولا ذلك كان عاملا معنويا يتخيل تخيلا ويتوهم توهما كالعامل الذى يرفع المبتدأ!! فإنه عند كتب الصناعة "الابتداء" والعامل الذى يرفع الفعل المضارع هو "التجرد"!! ثم أنشأوا لكل عامل مزايا وصفات، فهذا عامل قوى وذاك ضعيف، وذلك قوى هنا ضعيف هناك! على اختلاف طويل عريض (طخين من عندى بأه) بين البصرة والكوفة. حتى حكموا العامل فى اللغة فى إعراب الكلمة وفى الكلمة نفسها!! وفى تركيب الجملة وفى الجملة نفسها غير ملتفتين إلى تركيب وفصاحته وأسلوب وبلاغته فإن وجدوا فى استعمال الفصحاء ما يخالف ما قعدوا لووا عنق الكلام حتى يخضع لما أولوا!! وكأن العامل من أساطير اليونان كلى القدرة!!
وكفاية كده بأه عشان مسرور وكدهون . .
وصباح القشطة :))

لولا أن الشعر بالعلماء يزرى

هناك بتعبير نبيل فاروق عالم موازى لعالمنا وفيه كل العلوم موجودة بطريقة أخرى وبفهم مختلف :)) بجد بجد . . طب حقولك . . عارف عمونا الكبير أوى سيبويه مؤسس علم النحو بكتابه واللى بيخالفه يبقى مجنون!! فيه علماء كثيرون خالفوه فى تفسير الظاهرة الإعرابية!!يالهوى!! آه وربنا.واحد اسمه بن مضاء النحوى فسر الطظاهرة الإعرابية بطريقة مختلفة واتهموه بالجنون فى عالم التقليد الاعمى!!!وجاء د.شوقى ضيف دلوقت وأخرج تراث بن مضاء واامثاله لتسهيل دراسة النحو على الغلابة اللى زينا ولولا فضل الله ثم د.شوقى ضيف لما فهم أحدنا نحوا ولا بتاع :))  فالعلماء فى عليائهم يشطون احيانا ونسون أن العلم للبشرية وليس لهم وحدهم!! وغير دول كتير بس ماعلينا خلليك ساكت يا لسانى :)

"كان محمد شجاعا"طبعا كلنا حنرفع محمد وننصب شجاعا لكن ليه بأه هو ده اسمه تفسير الظاهرة الإعرابية.بالبلدى كده على أدنا الغلابة . عمونا سيبويه قال لنا ان "كان" أداة نسخ للجملة الاسمية "محمد شجاع" مبتدأ وخبر مرفوع أهم.كان بأه تسيب المبتدأ فى حاله وتنصب الخبر يعنى تخللى الخبر "فى خبر كان" :))) وتبهدله وتشيل رفعه وتخلليه منصوب يا ولداه :)) لأن كان واخواتها ستات جدعه :)) عمونا شوقى ضيف بأه لما سمع ليلى مراد بتقول"كان فعل ماضى ماتسيبه ف حاله والماضى إحنا مالنا وماله" انتبه لحاجة غريبة جدا :)) ان ليه مايكونش محمد اللى بعد كان مرفوع لأنه فاعل!!! :) الله!! مش كان فعل يبقى محمد فاعل مرفوع :)) طب وشجاعا؟! قالك ليه ماتكونش حال منصوب يعنى بالمختصر المزيد بهدل نحو سيبويه خالص مالص!!! :))) وده يعتبر عند إخواننا المحافظين كفر من قائله!!! كفر بالنحو يعنى ماتفهمش غلط :)) الغريب بأه ان كل ده اختلاف فى تفسير الظاهرة الإعرابية فقط وليس فى الإعراب نفسه والإعراب هو حركة آخر حرف يعنى وكله متفق عليها :)) عرفت بأه ان العلماء بيبهدلوا بعض لو حاول واحد يخرج عن المألوف والحلوف!!! الإمام الشافعى له بيت شعر جامد جدى :)) بيقولك:لولا ان الشعر بالعلماء يزرى. .لكنت الآن أشعر من لبيد!!!!!!تخيل كانوا حيقطعوه لو فقيه كان شاعر!!! فكتم فى نفسه يا عينى :((  تخيل فى عالم موازى وصلنا فيه اأشعار للشافعى قد لبيد!!!! الشافعى اللى قال عنه علماء اللغة "لغة الشافعى حجة"!!!! ولا حول ولا قوة إلا بالله . فى نفس العالم الموازى بأه فى علماء الظاهرية وأقواهم بن حزم :)) فهم لم يعملوا القياس ليدرموا ما سكت النص عنه ولم يحرموا سوى بالنص قووووم القوم التانيين قالوا عليهم مجانين ووصفوهم بأنه حرفيين ومخابيل ومتحجرين.قووم الناس اللى عتيز تتحر من قيود القياس ومش عارفه إيه هو لما افتكروا ان القياس اللى يحالفه يبقى مخبول وااهبل وسايب الدين قرر بعضهم يكتم ف قلبه زى الإماك الشافعى فى مسألة الشعر كده وقرر البعض دراسة مذهب الظاهرية وأخذ الخير منه وهو كثييييييير وترك العيوب التى فى كل المذاهب فاتهموا بالجنون والخبل ومافرقتش معاهم :)) أما بأه قوم تالتين قالك احنا نعمل اللى مزاجنا بلا فقه بلا شيوخ بلا بتاع والدين لله وربك رب قلوب وربنا غفور رحيم . . .وبوظوا الدنيا  ماعلينا . . . خلليك ساكت يا لسانى . . انت مالك ومال اللى بتتكلم فيه ده؟! انت جاهل ومابتفهمش شششششش :)) ومن أصل كتاب لمختصره لحاشيته لنظمه شعرا لشرحه لاختصار شرحه ونظم اختصار شرحه لحاشيةإختصار شرحه وهكذادواليك.ضاع النقد العلمى وأصبح فيه تقليد وبس . العلم أبسط من البساطة. والكهنة يكتمون العلم ويجعلونه كهانة وسحرا وسرا.وهناك علماء يفعلون ذلك بالعلم الآن.وعلى رأى عم عبده البواب"هى كيميا!!" تعرف ليه عم عبده البواب بيقول"هى كيميا" لأن زمان الكيميائى كان كان اسمه الخيميائى ودجال ومشعوذ وبيقلب الحجر لدهب بالسحر!! هبل طبعا لكن كتمانه للعلم والكيمياء عشان يفضل مسيطر وسيطرة خللى الناس تقول الكيمياء حرام وكفر لحد ماعرفنا يعنى إيه ولا مؤاخذه كيمياء :))استغفر الله 

أقول قولى هذا وأستغفر الله لى ولكم

شوية ظاهرية بالعامية عشان الزباين :)

طيب بالصلاة على النبى كده :) الظاهرية هو المذهب الخامس الخاص بأهل السنة غير المذاهب الأربعة المعروفة حنفى مالكى شافعى حنبلى.وكل مذهب له أصول والأصول ماتزعلش حد :)) تمام؟ أصول الأربعة قرءان وسنة وإجماع وقياس واستحسان ومصالح مرسلة وسد ذرائع ومذهب الصحابى وشرع من قبلنا حلو؟ ديه مصدر الإفتاء عندهم ومصدر التشريع والحلال والحرام. والظاهرية ماعندهمش يا كبدى غير قرءان وسنة وإجماع الصحابة المُتَيَقَّن فقط ودمتم بكل خير :)) يعنى لا بنقيس ولا بنستحسن ولا بنسد ذرائع ولا مصلحجيه ولا نُحَرِّم مخالفة مذهب الصحابى ولا لنا دعوة بشرع من قبلنا إلا إذا امرنا ربنا باتباعه فى شرعنا :)) تمام؟ ليه بأه الظاهرية كده؟ عشان الظاهرية بتقبل الكلام بتاع الوحى وبس من غير أى آراء بشرية لازقة فيه. وبتفهمه على أبوه كده من غير تحوير يعنى إقفل الباب نقفله إفتح الباب نفتحه :))) غيرنا ممكن يقول إقفل الباب ده مش معناها إقفله أوى ومش لازم لازم يعنى ومش حالا حالا :)) كده. طب.ده يفرق إيه؟ يفرق إن النص حيفضل محفوظ معناه بدون تدخلات السنين والأشخاص والأماكن ويوصل لحد عندك صاغ سليم زى ما المفروض يكون. وبكده حضرتك مش حترتبط بفهم فلان ده متشدد وفلان ده متساهل وفلان ده تابع للفرنجة وكده:)) . ولو النص بيسهل يبقى تمام ولو بيصعب يبقى تمام كل من عند ربنا. ولا حنزود عليه ولا حننقص منه. لو عايز انت تتورع زيادة انت حر مش حنمنعك بل بالعكس توكل على الله خير لكن ساعتها حيبقى ورعك بتاعك مش مفروض عليك وتبقى بتعمله عن طيب خاطر مش معتقد انه غصب عنك. وحتة اننا لا بنزود ولا بننقص دى مزعله ناس مننا بيقولك الشيخ الفلانى قال وده له ما له من العلم والمكانة وإحنا بنقولهم معاكو ومكانته عندنا أكبر كمان من عندكو ومن عِظَم مكانته عندنا ما بنقلدوش فى الغلط وبنقول مجتهد ولو أخطأ له أجر ولو أصاب فله أجرين. ونكمل بعدين عشان "الظاهر" كده فيه حد عايزنى :)) سلامو عليكو